Osmani: I kemi përmbushur kriteret për vizat, shtetet e BE-së duhet ta mbështesin këtë proces

23.06.2022 09:19

Osmani: I kemi përmbushur kriteret për vizat, shtetet e BE-së duhet ta mbështesin këtë proces

Presidentja Vjosa Osmani ka thënë se Kosova i ka përmbushur të gjitha kriteret për liberalizim të vizave, njofton Klankosova.tv.

Ajo, para mediave ndërkombëtare në takimin  mes përfaqësuesve të Bashkimi Evropian dhe liderëve të Ballkanit Perëndimor, ka theksuar se nëse kosovarët i marrin vizat kjo është një drejtësi e madhe për ata.

“Ne sigurisht shpresojmë, megjithatë nuk dua t’i rris pritshmëritë në këtë moment kohor. Sepse ky proces nuk është më në duart tona. Kosova i ka përmbushur të gjitha kriteret sa i përket liberalizimit të vizave vite më parë”.

“Ne u jemi përgjigjur të gjitha shqetësimeve të shteteve anëtare dhe tani është koha që shtetet anëtare të mbështesin vërtet këtë proces. Sepse kjo është një drejtësi e madhe ndaj popullit të Kosovës”, ka thënë Osmani, njofton Klankosova.tv.

Osmani ka thënë se e mbështesin procesin negociues për Shqipërinë dhe Maqedoninë e Veriut për të marrë të drejtën për kandidatë statusin për anëtarësim në Bashkimin Evropian.

Po ashtu, presidentja ka theksuar se janë në përkrahje të proceseve për Moldavinë dhe Ukrainën, që sipas saj, BE-ja duhet të shoh dhe t’u jap mundësi njerëzve si kosovarët që janë në gjendje të humbin jetën e tyre për familjen evropiane.

x