Stano: Kosova ta rikonsiderojë vendimin për vizitë të Petkoviqit

16.12.2021 11:26

Stano: Kosova ta rikonsiderojë vendimin për vizitë të Petkoviqit

Zëdhënësi i Bashkimit Evropian për Politikë të Jashtme, Peter Stano, ka deklaruar se vizitat zyrtare mes Kosovës dhe Serbisë duhet të realizohen ashtu siç janë marrë vesh palët.

 
Reagimi i Stanos vjen pasi që drejtori i të ashtuquajturës “Zyra për Kosovë” në qeverinë serbe, Petar Petkoviq, është kthyer mbrapsht dje në pikën kufitare në Jarinjë, duke mos iu lejuar hyrja në Kosovë.

Stano ka thënë se të gjitha vizitat zyrtare duhet të lejohen të ndodhin nga të dyja shtetet.

“Ne kemi marrë parasysh zhvillimet e fundit në lidhje me vizitat zyrtare. Duam të theksojmë edhe një herë se presim që të dyja palët të zbatojnë plotësisht të gjitha marrëveshjet e mëparshme, përfshirë marrëveshjen për vizitat zyrtare. Sipas marrëveshjes, të gjitha vizitat duhet të kryhen në një mënyrë që përmirëson procesin e normalizimit ose të kontribuojë në punën e përgjithshme në kontekstin e dialogut të mbështetur nga BE. Ne presim që palët t’i respektojnë këto udhëzime”, tha Stano për portalin kosovoonline, transmeton lajmi.net.

Stano ka thënë që Kosova duhet ta rikonsiderojë vendimin për ndalimin e Petkoviqit.

“Ne i bëjmë thirrje Kosovës që ta rikonsiderojë vendimin e saj në lidhje me vizitën”, ka shtuar Stano.

x